Serangan Fajar yang Gagal (Fragmen Betawi)

JAM enam pagi Bang Jali udah ngaton di rumah Pak Sumali, juragan sembako yang siap ngebeli tanah liwat Bang Jali. Bang Jali diminta dateng pagi-pagi buta bahna Pak Sumali juga kudu berangkat ke Singapura. Hari ini Pak Sumali mau ngasih persekot, tanda jadi beli tanah. Karena itu, abis wiridan di masjid, Bang Jali langsung ngempag ke rumah Pak Sumali. Kebetulan ini ari Sabtu, jadi jalanan rada longgar. Biar naék motor sonder ngebut, Bang Jali nyampé di rumah Pak Sumali tepat waktu.
Duit lima juta segera masup bagasi motor Bang Jali. “Begitu surat-surat tanahnya bérés, duit segera saya bayar,” kata Pak Sumali. “Pajaknya kan tinggal dibayar. NJOP sudah ada ‘kan?”
Bang Jali mésm-mésem. “Semuanya under control, Bos,” kata Bang Jali.
“Jiah, under control. Sok Inggris,” kata Pak Sumali ketawa.
Bang Jali segera balik bakul sembari bersiul-siul. Kebayang wajah Mpok Minah yang pasti mésemnya kagak abis-abis begitu terima setoran. Abis itu, Bang Jali berencana ngegelandang bininya ke dalem kamar. Soalnya, malem Jumat kemarén bininya masih kedatangan tamu. Waktu seminggu bikin kepala Bang Jali nyut-nyutan juga.
“Ni ari gué kudu dapet,” Bang Jali ngebatin sembari ngelés kanan kiri ngindarin motor-motor yang jumlahnya makin bejibun kayak laron. Jakarta, batin Bang Jali, émang surga pengendara sepéda motor. Saban ari belérot-lérot orang naék motor. Yang mau kerja, mau nganterin anak sekolah, dagang, nagih utang, bayar utang. Macem-macem. Péngén juga Bang Jali punya kumpulan PSMS (Pengendara Sepéda Motor Sejati).
Bang Jali nyampé di rumah jam delapanan. Begitu masup ke dalem rumah, Bang Jali ngeliat Mpok Ulfah, mpoknya Mpok Minah. Kagak sendirian, tapi sama cucunya.
“Eh, ada Mpok Ulfah,” Bang Jali nyium tangan mpok iparnya.
“Iyé,” Mapok Ulfah mésem-mésem. “Gua abis ngeliatin Mpok Ijah nyang katanya sakit.”
Abis basa-basi sedikit, Bang Jali buru-buru ngeluarin burung dari dalem. Sembari nénténg kadang burung, Bang Jali pun bersenandung, “putuslah harapankuuuu....letihlah aku meeenunggu.......”
Mpok Minah mésem-mésem.


* Bahna = karena; Ngaton = menghadapkan diri; ngempag = buru-buru berangkat;