Tatkala Bang Jali Ngidam (Fragmén Betawi)

Kagak sari-sarinya kepala Bang Jali puyeng nggak puguh lagu. Nyut-nyutan kayak ditusuk-tusuk peniti. Idungnya mampet sebelah kayak lobang got ketutup sampah. Selaén itu, rasanya enek terus. Itu sebabnya kopi yang sejak tadi disodorin bininya kagak dia colék-colék.
Mpok Minah masih bekutek di dapur ketika dia dibikin kagét suara uwé-uwékan Bang Jali kayak orang mau muntah. Lama-lama, Mpok Minah jadi sebel juga ngedengernya.
“Bang, adé apé sih?”
“Enek. Kepalé gué puyéng.”
“Udéh minum obat belon?”
“Belon.”
“Ya beli sono!”
Kepala Bang Jali rasanya makin puyeng. “Elu beliin sono!”
“Ayé pan lagi répot Bang. Masih cebrik.”
Bang Jali uwé-uwékan lagi. Kali ini makin kenceng. Mpok Minah nyamperin juga akhirnya.
“Bang, jangan-jangan abang ngidam!” teréak Mpok Minah.
“Ngidam? Ngidam dengkul lu empuk. Émang elu bunting lagi?”
“Biasanya pan gitu, Bang. Ayé nyang bunting, abang nyang uwé-uwékan.”
“Jadi sekarang elu bunting lagi gitu?”
“Bukan ayé, Bang. Siapé tau bini simpenan abang.”
“Mulut lu kayak talang bocor, ngegerojok ajé,” Bang Jali makin sewot.
“Ya siapé tau, Bang. Naményé juga orang laki, kagak boléh ngeliat betis licin,” Mpok Minah romannya kagak mau ngalah.
“Udah, mendingan elu kerokin gué. Masup angin nih.”
“Minté ajé amé nyang di sono, Bang. Amé bini mudé abang.”
Bang Jali males nimpalin. Sebatang rokok segera menelusup di sela-sela bibirnya. Sesaat kemudian, Bang Jali batuk-batuk.
“Lagi sakit mah berenti ngerokok, Bang,” kata Mpok Minah sembari ninggalin lakinya dengan penderitaannya sendiri.
Ketika Mpok Minah ampir bérés dengan pekerjaan dapurnya, Déwi Béncong tau-tau nongol. Seperti biasanya, rumah Bang Jali langsung ramé oléh suara Déwi yang nama sebenernya Asnawi.
Setelah saling ngelémpar banyolan amé Mpok Minah seperti biasanya, Mpok Minah langsung minta Déwi ngerokin Bang Jali.
“Asyik nih, dapet order,” Déwi kegirangan dan langsung beraksi. “émang kenapé sih bukan Mpok Minah ajé yang ngerokin?” Déwi nanya sembari terus ngerokin Bang Jali.
“Gué males, Déw. Dikerokinnya kelesedan, kagak bisa diem. Kayak anak kecil. Céngéng. Dari kemarén sih dié minté dikerokin. Untung elu dateng.”
Déwi terus ngerok Bang Jali. Bilur-bilur mérah segera penuh di sekujur tubuh Bang Jali.
“Ini mah cika beneran, Mpok. Kalu kagak dikerokin bisa bahayé. Bisé kena angin duduk,” Déwi terus nyerocos. “Mpok mau Bang Jali kena angin duduk?”
Mpok Minah kagak nyaut.
Rapi ngerokin, Déwi bebisik di kuping Bang Jali. “Yé, kalu bini disuruh ngerokin ajé kagak mau, cari ajé bini nyang laén, Bang.”
“Somprét lu, provokator!”

Note: Kagak sari-arinya = bukan sesuatu yang terjadi setiap hari; Nggak puguh lagu = tidak karuan; Bekutek = sibuk terus menerus; Cebrik = dekil;