Ketika Mpok Minah Empet

MUSIM ujan dateng dan Bang Jali bener-bener males ke mana-mana. Kaki romannya males diajak ke mana-mana. Yang paling empet jadinya emang Mpok Minah. Saban ari ngeliat Bang Jali nyingkrek di rumah kayak ayam sakit nunggu dipotong. Untungnya, biar kata ngendon di rumah terus, duit bakal belanja terus disetor Bang Jali. Kalu kagak, Mpok Minah bisa ngaprak searian bleng dah.

            “Kapan sih musim ujan abisnya, Dieh?” Mpok Minah nanya Mpok Rodieh yang kebetulan dateng mao ngerumpi.

            “Ya musim ujan waktunya abis ya abis, Mpok Mineh. Emangnye kenape?”

            Mpok Minah ngelirik lakinya yang lagi asik ngelepus sembari nyingsot-nyingsot mancing burung kutilangnya. “Gue empet ame laki gue. Di rumeeeeh terus. Jalan kek ke mane gitu.”

            Mpok Rodieh mesem-mesem. “Disyukurin aje, Mpok Mineh laki kayak Bang Jali mah. Biar kata di rumeh, duit bakal belanje pan lancar.”

            “Iye, ntunya sih lancar, tapi yang ntunya juga bentar-bentar minte.”

            “Ntunye yang mane?”

            “Pora-pora lu ah. Kayak kagak tau Bang Jali aje.”

            Mpok Rodieh mesem-mesem. “Ya bagus ntu namenye, Mpok. Die pan mintenye ame bini kendiri. Coba kalu die nyari di mane-mane. Pan berabe.”

            “Mau gue potong burungnye!” Mpok Mineh cemberut.

            Diem-diem, matahari pagi ‘ntu nongol juga dari belah ngetan. Ari ini romannya bakal penter. Bang Jali buru-buru keluar dan berjalan ke samping rumah. Diambilnya pacul dan mulain nyangkul.

            “Laki lu mao ngapain tuh?” Mpok Rodieh ngelirik Bang Jali yang romannya sebet banget ngebawa paculnya.

            “Kagak tau gue. Die mah kagak usah ditanya. Antepin aje.”

            Begitu Mpok Rodieh pulang, diem-diem Mpok Mineh nyamperin lakinya yang lagi bekutekan di kebon di samping rumah. Dengan sigap Bang Jali ngerapiin pohon-pohon lompong, pohon  pisang, pohon singkong, dan beberapa pohon kembang. Tanah-tanah di pongkol pohon-pohon itu dibikin gembur. Keringet Bang Jali romannya udah mulain ngocor.

            “Ngapain sih, Bang?” Mpok Minah kagak sabar pengen nanya.

            “Pan lu liat kendiri gue lagi ngapain….”

            “Iye. Tapi ‘ntar abang sakit deh.”

            Bang Jali bediri terus ngelap keringetnya.

            “Elu pegimane sih? Gue diem aje elu empet. Gue beres-beres kebon elu cerewetin.”

            “Maksud aye, ape kek yang dikerjain. Yang enteng-enteng aje. Yang berat-berat mah suruh aje si Johar atawa si Arifin tuh yang kerjenye kagak puguh lagu.”

            “Emang kalu gue mao kerjain kendiri kenape?”

            “Nti kalu abang sakit pegimane? Pan repot, Bang.”

            “Repot kenape?”

            “Auk ah,” Mpok Minah melengos. “Terserah abang dah.”

            Bang Jali mesem-mesem. “Kopi gue bawa ke mari, Mineh!” tereak Bang Jali sembari nerusin kerjaannya.

Catetan: Ngetan = Wetan, Timur; Penter = terang, cerah; Sebet = Sigap; Antepin = Biarkan.