Bang Jali Versus Mas Murtaji

Oleh: Aba Mardjani

HIDUP di pinggiran kota selama ini menyenangkan bang Jali. Apalagi, anak bontotnya, Mat Rais, sudah kawin dan tinggal di rumah mertua indah untuk sementara. Paling kagak, beban bang Jali sekarang kagak seberat dulu lagi. “Gue tinggal ngempanin elu ame bacot gue doang. Makin tua tinggal uncang-uncang kaki nungguin cucu yang ngeberojol satu-satu,” kata bang Jali ame bininya, Mpok Minah.

            “Iye, jangan lupa ibadah, Bang. Banyaki ibadah,” Mpok Minah ngingetin lakinya.

            “Ntu mah lu kagak usah ngajarin. Gua ngarti.”

            Rumah bang Jali rada nyempil di antara rumah-rumah warga RT 12 Kampung Boro-boro Senang. Di antara rumahnya, ada sebuah tanah kosong yang panjangnya kira-kira 10 meter dan lebar 5 meter. Tanah itu milik tetangga bang Jali. Namanya Mas Murtaji, orang Jawa. Bang Jali tak tahu persis Jawa-nya di mana. Tapi, bininya orang Betawi asli. Namanya Mpok Amsani. Tapi, biar kata sama-sama Betawi, Mpok Amsani ini bertolak belakang dibanding Mpok Minah.

            Kata Mpok Minah, Mpok Amsani paling demen ngomongin tetangga. Bawaannya kagak boleh ngeliat tetangga seneng.

            “Abang peratiin dah waktu kemaren kita beli tipi 20 in,” kata Mpok Minah. “Si Amsani tuh Bang, langsung nangis ame lakinya, minta dibeliin tipi 24 in.”

            Bang Jali biasanya nanggepin ocehan bininya sembari mesem-mesem. “Biarin aje die begitu. Nyang penting elu pan kagak. Lagian, udah lu kagak usah ngomongin si Amsani. Die mau nyungsang kek, nyungseb kek, antepin aje.”

            “Aye sebel, Bang. Kok ade ye orang kayak begitu,” Mpok Minah romannya masih penasaran.

            “Ye ade. Manusia itu macem-macem, Minah. Ntu mengkenye dunia jadi rame. Kagak sepi kayak kuburan.”

            Tapi, ari ini, Bang Jali yang romannya jadi belingsatkan kayak beton dioseng. Muasalnya, karena ujug-ujug tanah di sebelah rumahnya mau dibangun rumah kontrakan sama Mas Murtaji.

            Sebenarnya, kagak ada yang berhak melarang Mas Murtaji ngebangun rumah kontrakan di tanahnya sendiri. Nyang jadi masalah buat bang Jali, bangunan rumah kontrakan itu dibikin ngepas sesuai tanah yang ada. Jadi, nantinya, yang nempatin rumah itu bakal keluar masuk lewat tanah milik bang Jali yang memang termasuk sejengkal halaman di depan rumahnya sampai ke samping-samping. Belon lagi airnya bakal jatuh di tanah Bang Jali. Menurut aturan agama, hal itu dilarang. Apalagi lewat sejengkal tanah itu juga selama ini bang Jali mundar-mandir pake skuter antiknya.

            “Udah, antepin aje, Bang. Die mau nyungsang kek, nyungsep kek,” kata Mpok Minah waktu ngeliat bang Jali murang-maring.

            “Nyindir lu!” bang Jali melotot. Mpok Minah mesem-mesem. “Ini bukan soal ape-ape atau kagak ape-ape, Minah. Ini udah keliwatan.”

            Sore ari, waktu udara mendung dan matahari romannya malu-malu ngintip dari balik awan item, bang Jali nemuin Mas Murtaji. Kepada laki-laki itu bang Jali langsung nyampein keberatannya.

            Mas Murtaji mesem-mesem setelah mendengar keluh kesah bang Jali.

            “Bang Jali,” kata Mas Murtaji kemudian. “Saya membangun rumah di tanah istri saya sendiri. Soal nanti mau tidak mau penghuni rumah menginjak tanah Bang Jali, saya pikir itu wajar. Namanya kita hidup bertetangga. Saling menerima, saling memberi.”

            “Kagak bisa, Mas.”

            “Kalau sampai Bang Jali bersikeras melarang, saya bisa saja melaporkan bang Jali ke polisi atau Komnas HAM. Sebab, bang Jali sudah mengganggu hak asasi manusia, hak asasi saya untuk membangun rumah di tanah istri saya sendiri. Bang Jali bisa dipenjara loh,” kata Mas Murtaji.

            Bang Jali makin muntap. “Eh, Murtaji, silakan ngadu ke mane kek. Ke polisi kek, ke Komnas HAM kek, ke Amnesti Internasional kek, ane kagak takut. Ente tuh ngomong jangan asal nyablak soal hak asasi. Ane juga kagak buta. Hak asasi ntu boleh-boleh aja asal kagak ngeganggu orang, kagak bertentangan dengan etika, kagak berlawanan ame agama,” bang Jali rada ngos-ngosan. “Inget ye, kalu ente ngebandel, ntar ane colok mate ente sekalian!”

            Setelah berkata begitu, bang Jali langsung ninggalin rumah Mas Murtaji yang romannya jadi rada takut juga.

            Mas Murtaji sendiri, masih dengan ati deg-degan masuk ke dalam rumahnya. Di pojokan, Mas Murtaji melihat istrinya, Mpok Amsani, lagi melotot.

            “Dasar laki geblek lu, Mas,” Mpok Amsani nyemprot lakinya. “Inget ye, kalau Mas kagak nerusin pembangunan rumah kontrakan, sebulan aye kagak bagi. Biar nyahok sekalian!”

Jakarta, 200211

Kamus

Ngempanin = memberi makan; bacot = mulut; uncang-uncang = ongkang-ongkang; ngeberojol = keluar, dilahirkan; nyempil = terselip; antepin = biarkan; romannya = nampaknya; mengkenye = makanya; dioseng = digoreng tanpa minyak; murang-maring = belingsatkan.

Naskah ini juga, kalo gak keberatan, bisa dibaca di:

http://fiksi.kompasiana.com/prosa/2011/02/20/bang-jali-versus-mas-murtaji/