Search This Blog

Tuesday, February 8, 2011

EMPAT PILIHAN

By: Aba Mardjani
“IDUP pan cuman sekali, Bang. Kenape sih kagak abang cuekin aje?”
            Mata Bang Jali melotot. Tapi, Mpok Minah pora-pora kagak engeh. “Cuekin mate lu juling! Ini kudu dilurusin!”
            Mpok Minah menjep. “Mendingan abang ngeluruin nyang laen aje, Bang!”
            “Ngelurusin nyang ntu mah gampang!” Bang Jali makin sewot.
            “Ah, abang ngeres melulu. Maksud aye kawat jemuran nyang bengkok!”
            “Udah diem aje lu. Ini urusan orang laki!”
            Awalnya Bang Jali juga kagak mau peduli ame si Jabrik, preman di ujung gang yang ngaku-ngaku anak Betawi. Tapi, begitu selentingan bang Jali denger si Jabrik ngaku-ngaku pernah beguru silat ame Wak Haji Demek, bang Jali jadi berasa gerah. Dia kagak mau nama Haji Demek yang kesohor jago beksi di Pondok Pinang jadi rusak.
            Maka, abis turun sembahyang magrib, bang Jali nyamperin anak muda preman di ujung gang nyang suka petantang-petenteng kayak bebegi. Kebetulan, bang Jali langsung ketemu. Si Jabrik lagi asik sekakak-cekikik di pos ronda ujung gang.
            “Elu yang nama lu si Jabrik?” Bang Jali bediri di depan anak muda itu.
            Si Jabrik mandangin bang Jali. Roman-romannya rada heran dia ngeliat seorang laki-laki setengah baya yang bediri seperti nantangin dia.
            “Iye. Ade persoalan ape, Be?”
            “Babe...babe...emangnye lu anak gue!” Bang Jali ngebentak. “Beneran lu anak Betawi? Beneran lu belajar beksi ama Wak Haji Demek? Jangan-jangan elu emang cuman mao ngerusak nama anak Betawi ame nama Kong Haji Demek!”
            Si Jabrik ngakak kayak ngeledek bang Jali. “Kalu iye, abang mao ape?”
            “Kalu beneran, ntu namenya elu beurusan ame gue.”
            “Abang nantangin aye?”
            “Bukan nantangin. Gue mao ngelurusin persoalan ini. Tapi, kalu elu kagak bisa diurusin, ape boleh buat dah.”
            “Maksudnya ngelurusin pegimane, Bang.”
            Bang Jali narik napas.
            “Begini ya Tong,” Bang Jali nyebut nama Si Jabrik dengan Entong. “Gue sebenernya masak bodoh aje elu mau nyungsang kek, nyungseb kek. Tapi, bahna elu bawa-bawa nama Kong Haji Demek segale, maka tugas gue buat ngelempengin.”
            “Saye belon ngerti  maksud Abang..”
            “Gini ya, Tong. Gue kasih elu empat pilihan. Yang pertama, elu kagak usah bawa-bawa name Betawi kalu kelakuan lu kagak bener. Ape lagi bawa-bawa nama Kong Haji Demek.”
            “Yang kedua, Bang?” Si Jabrik mesem-mesem.
            “Yang kedua, mendingan elu jadi anak Betawi yang baek-baek aje deh kalu elu emang anak Betawi. Rajin solat, rajin ngaji. Terus yang ketiga, kalu elu emang mao tetep jadi preman, mendingan elu jujur aje asli lu dari mane, guru silat lu siape? Atawa elu kagak usah bawa-bawa suku segale dah.”
            “Yang keempat, Bang?” Si Jabrik masih mesem-mesem.
            “Kalu semuanya elu kagak mau ikutin, elu minggat aje dari sini. Kalu elu mao tetep jadi preman, ya di mane kek. Jangan sampe di depan mate gue, apalagi di depan kuping gue.”
            Si Jabrik bediri nantangin Bang Jali.
            “Kalu saya tetep kagak mao, Bang?”
            “Kuping lu mampet! Tadi pan gue udah bilang, ntu artinya elu beurusan ame gue!”
            Si Jabrik berjalan ngelinterin Bang Jali. Bang Jali siap siaga. Sesaat kemudian, Bang Jali merasa Si Jabrik menghajarnya dari belakang. Bang Jali ngeles. Lantas, dengan sekali gebrak, Si Jabrik nyungseb di got. Bang Jali ngangkat kakinya untuk nginjek muka Si Jabrik yang udah belepotan lumpur got.
            “Ampun...ampun...ampun...Bang. Saya ngaku...saya ngaku...saya juga nggak bakal jadi preman lagi!”
            Bang Jali narik kakinya.
            “Nah, gitu dong. Coba dari tadi begitu, pan jadi kagak perlu make berantem segale!” Abis ngomong begitu, Bang Jali langsung ngeloyor.*


           

No comments: