Malem Pertame

By: Aba Mardjani

ATI bang Jali jadi kagak bisa adem pagi itu. Bawaannya gelisah terus. “Ade yang gue mao omongin ame elu ntar siang,” kata bang Jali waktu pamitan sama bininya, Mpok Minah.

            “Ada apaan sih, Bang? Roman-romannya penting banget?”

            “Bukan penting lagi, tapi penting bin genting,” Bang Jali menyahut sembari ngeloyor ninggalin bininya yang jadi melongo kayak kambing kesambet.

            “Sekarang abang mao ke mane?” Mpok Minah betereak kemudian.

            “Mao nyari duit dulu!”

            “Berarti nyari duit lebih penting dong dibandingin ame yang tadi mao abang omongin.”

            “Nyari duit ntu penting bin genting bin penting!”

            Di tempat biasa ngumpul, bang Jali menarik bang Karim. “Sini, Rim. Ade yang mao gue omongin ame elu!”

            “Bujug dah, romannya serius banget lu!”

            Bang Jali kemudian bercerita soal anak laki-lakinya, Mat Rais, yang baru saja kawin sama Siti Romlah. “Yang bikin gue kagak abis pikir, Rim, pas pagi-pagi gue kagak ngeliat Mat Rais mandi basah. Padahal, lu tahu pan gimana serunya malem pertama.”

            Bang Karim mesem-mesem. Bikin bang Jali geregetan. “Gile juga lu ye. Masak yang begituan lu cerita-ceritain?”

            “Maksud gue, gue heran ame tu anak. Gue kuatir dia impoten, belon bisa, atawa ape gitu, Rim.”

            “Ya, sebabnya pasti macem-macem lah, Li. Jadi, lu liat aja sampe tiga hari ke depan. Atau seminggu. Nah, kalo rambut Mat Rais tetep kagak basah, baru dah lu tanyain kenape sebabnya.”

            Tapi, Bang Jali rupanya sudah tak sabaran. Begitu pulang ke rumahnya, dia langsung cerita kepada Mpok Minah.

            Mpok Minah cekikikan setelah mendengar cerita lakinya.

            “Jadi ntu yang abang kuatirin?”

            “Kok elu malah cekikikan, Min?”

            “Ya iyalah, Bang. Emangnya abang ragu ame Mat Rais. Abang takut Mat Rais kayak banci gitu atawa yang laen-laen.”

            “Ntu udah pasti, Min. Soalnye pan gue udah kepengen punya cucu. Urusannya bisa berabe kalo Mat Rais kagak bisa ngelaksanakan tugasnya.”

            “Sini aye bisikin, Bang,” Mpok Minah menarik lakinya, lalu membisikkan sesuatu di kuping Bang Jali.

            “Kok elu kagak bilang-bilang?” Bang Jali nyecer bininya setelah  sesaat keliatan rada kaget.

            “Masak urusan perempuan pake dicerita-ceritain sih, Bang? Dateng bulan pan emang udah biasa buat perempuan.”

            Bang Jali kelihatan sedikit tercenung. “Kesian banget ye Mat Rais.”*