Bang Jali dan Mpok Minang Kondangan

Bang Jali dan Mpok Minah Kondangan

Abis solat magrib, Bang Jali ame Mpok Minah udah sebrak-sebrakan dandan. Maklum, mau kondangan di gedong. Mulanya Bang Jali mau dandan cara Betawi, tapi mulut Mpok Minah langsung nyol-nyol kayak kentongan rusak.

“Kité pan kondangannyé di gedong, Bang. Kudu dandan nyang biasé ajé,” Mpok Minah séwot romannya waktu Bang Jali ngotot. “Paké batik ajé, Bang. Abang pan adé tuh batik yang udah tujuh lebaran Abang kagak paké-paké.”

Mau kagak mau, Bang Jali nurut. Kuatir juga dia urat léhér Mpok Minah putus. Bini kayak Mpok Minah pan cuman ada atu-atunya di dunia. Cedok di pipinya masih ada, pinggangnya masih ramping biar kata umur makin belipet. Pinggulnya? Jangan ditanya dah.

Singkat cerita, Bang Jali dan Mpok Minah sampailah di sebuah gedong gede di suatu tempat. Mubil-mubil udah hampir memenuhi pelataran parkiran. Bang Jali juga rada répot nyari tempat parkir buat sepeda motor 2-taknya yang kalu jalan bunyinya tréng téng téng téng.... Bang Jali selalu membanggakan sepeda motornya. Biar kata butut, sepéda motor itu bukan hasil krédit, tapi beli kés énd kéri.

Di méja penerima tamu, Bang Jali nyuruh Mpok Minah yang ngisi buku tamu. Maklum, tulisan Bang Jali kayak cékér ayam. Sebaliknya, kalu nulis paké bahasa Arab, Bang Jali jagonya dah. Selain itu, Mpok Minah juga kagak mau Bang Jali deket-deket dengan gadis-gadis penerima tamu yang mukanya bening-bening kayak abis diampelas. Takut Bang Jali kesetrum.

Kelar ngisi buku tamu dan nyemplungin amplop kondangan, Bang Jali nggak sengaja ketemu Pak Jazuli, seorang guru di sebuah SD kagak di kampung sebelah.

“éh, Bang Jali. Apa kabar?” Pak Jazuli ngagétin Bang Jali.

Basa-basi sebentar, Pak Jazuli ngajak Bang Jali dan Mpok Minah menyantap hidangan-hidangan yang disediakan. “Salamannya nanti saja, Bang Jali, Mpok Minah. Nanti sekalian pulang. Lihat kan, antreannya panjang. Daripada nanti keabisan makanan, lebih baik kita makan dulu, baru salaman.”

Bang Jali setuju, biar pun Mpok Minah sebentar-sebentar ngémpos pinggang lakinya. “Lu diem ajé déh. Kita kenyangi perut ajé dulu,” Bang Jali bebisik.

Sonder disuruh-suruh lagi, Bang Jali ngembat segala hidangan yang tersedia. Kambing guling, sapi panggang, bulgogi, sop, és krim dan entah apa lagi dah. Ngarti kagak ngarti, Bang Jali kagak peduli. Yang penting embat sampé perutnya berasa mau meleduk saking kenyangnya.

“Bang,” Mpok Minah nyolék lakinya. “Udah rada sepian tuh. Nyok kita salaman.”

Sembari nyungkil sisa makanan dari sela-sela gigi depannya bikin Mpok Minah rada enek, Bang Jali ngikutin bininya.

“Minah,” Bang Jali bebisik di kuping bininya.

“Apé sih, Bang?”

“Perasaan gué, kita nggak kenal amé penganténnyé.”

Mpok Minah coba merhatiin kedua mempelai.

“Bujug bunéng, Bang. Iyé. Yang kawin pan si Soleha amé siapé, Bang? Hendri yé.”

“Iyé. Tapi ‘ntu pan bukan Soleha. Perasaan gué Soleha rada pendekan. Nyang ‘ntu mah perempuannya tinggi.”

Bang Jali dan Mpok Minah buru-buru minggir. Terus ngacir. Sampé di luar, kepada seorang Satpam, Bang Jali nanya.

“Mas, kalau perkawinan Hendri sama Soleha di mané yé?”

Sonder merhatiin Bang Jali, si Satpam yang romannya semalem belon dibagi amé bininya menunjuk gedung sebelah. Sesudah saling pandang, Bang Jali dan Mpok Minah langsung kabur ke gedung sebelah.

“Bang,” Mpok Minah manggil lakinya.

“Adé apé? Gimané sih bisé salah? Terus, duit yang udah kité masupin ke kotak di sono pegimané? Terus, ‘nti di kotak perkawinannya si Soleha kita masupin apé? Kan kité nggak nyiapin gegawan lagi, Bang.”

“Udah lu nggak usah pusing,” Bang Jali terus melangkah. “Berapé tadi kité kondangannyé?”

“Mapuluh rébu, Bang.”

“Ya, mayan. Itung-itung biaya makan kité.”

“Terus buat si Soleha?”

“Ya, selaman ajé. Setor muké.”

“Nggak masupin amplok lagi, Bang?”

“Duit mapuluh rébu kagak ada artinyé buat lakinyé si Soleha. Dié pan pengusahé mudé. Nyuk dah. Ntar keabisan.”